Супермаркетите во Велика Британија користат картонски слики од овошје, зеленчук и други намирници за да ги пополнат празнините на полиците поради проблеми со снабдувањето, пишува The Guardian.
Tesco почна да користи фотографии со аспарагус, моркови, портокали и грозје, што предизвика потсмев на социјалните мрежи.
„Ммм, вкусни фотографии од аспарагус“, напиша еден корисник на Twitter.
Други се потсмеваа на преголемите слики.
„Ми се допаѓа што аспарагусот расте до оваа големина во ОК. Тоа зависи од нашата клима, сигурен сум“, напиша друг твитерџија.
Некои потсетија дека ваквата слика наликува на сцените во пародијата за Северна Кореја „The Interview“ (2014) во кои на полиците во продавниците има картонска храна.
Муштериите забележале и лажни моркови во Факенхам, картонски аспарагус во Лондон, слики од портокали и грозје во Милтон Кејнс и 2Д шишиња со течност за перење во Кембриџ.
Сето ова се случува поради недостаток на работници, што доведува до мала достапност на некои артикли во супермаркетите.
Брајан Робертс, аналитичар за малопродажба во Shopfloor Insights, рече дека само што почнал да забележува картонски исечоци од свежи производи во изминатата година, но рече дека слични тактики биле во сила веќе некое време.
„Тоа стана доста вообичаено. Тоа не е само поради недостигот, туку затоа што многу поголеми продавници сега се едноставно преголеми“, вели тој.
Пополнување простор
Тој рече дека ова е само една од низата тактики што се користат за пополнување на просторот.
Tesco тврди дека употребата на слики од овошје и зеленчук не е поврзана со неодамнешните проблеми во синџирот на снабдување.
Супермаркетите и производителите го намалија опсегот на различни видови тестенини, кафе или чаеви што ги продаваат за да го олеснат протокот на стоки.
Некои гломазни и не многу исплатливи артикли, како што се флаширани газирани пијалоци и вода, исто така се симнати од листата на приоритети за испорака поради недостаток на возачи, што значи дека може да има поголеми празнини на полиците од вообичаеното.
Зголемувањето на пазарењето преку интернет, во меѓувреме, остави многу супермаркети повеќе да не складираат непрехранбени производи што, како што се телевизори, CD-а или котли за вода, како што тоа го правеа некогаш, оставајќи празен простор што многумина не успеаја да го пополнат со алтернативни производи.
Картонски исечоци од скапи предмети како што се детергенти, протеински прашоци и алкохолни пијалоци како џин, исто така, понекогаш се користат за да се спречи кражба во продавници. Сликите на артиклите се ставаат на полиците за да се покаже достапноста, а клиентите го добиваат вистинскиот производ при наплата.