Џанлуиџи Буфон, 45-годишниот легендарен италијански голман под договор со Парма, доби понуда да ја продолжи кариерата во Саудиска Арабија.
Трансфер експертот Џанлука ди Марцио пишува дека пред него е одлуката да продолжи во клубот во кој ја започна својата блескава кариера, да се пензионира или да прифати трансфер во се попопуларната лига за ветераните, но и европските ѕвезди.
Трофејниот голман кој во својата кариера настапуваше за Парма, Јувентус, ПСЖ и италијанската репрезентација наводно има понуда вредна 15 милиони евра да дојде во Саудиска Арабија. Буфон минатата сезона бранеше на 19 натпревари. Прими 24 гола, а пет натпревари завршија без топка во мрежата.
Поранешниот светски првак и европски вицешампион со Италија во кариерата одиграл 975 натпревари за клубовите и 176 за репрезентацијата. Со Јувентус, тој беше 10-кратен шампион на Италија и трипати финалист во Лигата на шампионите.
