Фудбал
СЕРИЈА А 2019/20

Буфон: Лацио е во предност во трката за Скудетото

21. февруари 2020 - 17:06 | Ф.З.

Легендарниот голман на Јуве смета дека неиграњето во Европа е голема предност за Лацио во однос на неговиот тим и Интер во борбата за титулата.

Јувентус, Лацио и Интер се во израмнета битка за Скудетото во Италија оваа сезона, која конечно донесе неизвесност во Калчото.

Џанлуиџи Буфон е замена за Војчех Шченсни, но добива шанса понекогаш. Сепак, тој е легенда, играч со огромно искуство и преку 20 сезони во Серија А. 

„Доколку Интер помине во наредната фаза од Лига Европа, тогаш би рекол дека Лацио ќе биде најголем фаворит. Тие играат само за викенд, одморени се и ќе ни направат најголеми проблеми“, вели Буфон.

Неговиот Јувентус се натпреварува во Лигата на шампионите каде има амбиции да оди докрај, додека Антонио Конте вели дека Интер нема да ја сфаќа Лига Европа несериозно. За разлика од нив, Лацио испадна од Лига Европа во фазата по групи, испадна и од Копа Италија и сега е слободен целосно да ѝ се посвети на Серија А.

Нормално, со оглед на тоа што во јануари наполни 42 години, неизбежно беше и прашањето до кога планира да игра.

„Не знам до кога ќе играм. До јуни сигурно, а потоа ќе видиме“, сепак Буфон не вели дека ќе се пензионира.

Коментирај