Ноќеска Денвер Нагетс по пресврт ја оствари третата победа во плеј-офот против Лос Анџелес Лејкерс (112:105), кои достигнаа бројни негативни рекорди, што е една од главните теми на навивачите.
Имено, Лејкерс не успеаја 11-ти пат по ред да слават против Денвер, кој со новиот триумф најави „метла“, слична на она лани кога беше 4:0 во партии.
Исто така, Леброн Џејмс никогаш досега не загубил од една екипа 10 пати по ред, а токму тоа успеаја да му го направат Никола Јокиќ и соиграчите.
Сето тоа го искористи славниот Чарлс Баркли, кој на уникатен начин во студиото ја покажа моменталната состојба на Лејкерс.
По натпреварот во кој Денвер стигна до третата победа, Баркли посегна по метла, а потоа го исчисти подот.
На овој начин сакаше да прикаже како моментално изгледаат дуелите меѓу Нагетс и Лејкерс.
А, што ес однесува на самиот натпревар, Лејкерс првата четвртина ја добија со 10 разлика (33:23), но потоа Денвер направи пресврт кога, откако во втората намали на 4 разлика, третата ја доби со 34:22.
Најефикасен на паркетот беше домашниот кошаркар Ентони Дејвис со 33 поени и 15 скокови, а Леброн Џејмс уфрли 26 со 6 скока и 9 асистенции. Само уште Остин Ривс постигна двоцифрен број поени (20), а останатите од Лејкерс не стигнаа ниту до 9.
Кај гостите од Денвер, Арон Гордон имаше дабл-дабл со 29 поени и 15 скокови, исто како и Никола Јокиќ кому една асистенција го делеше од трипл-дабл бидејќи заврши со 24 поени, 15 скокови и 9 асистенции. Џамал Мареј имаше 22 поена и 9 асистенции, а Мајкл Портер 20 пооени и 10 скока.
Резултати:
Орландо Меџик - Кливленд Кавалирс 121:83 (2-1)
Филаделфија 76ерс - Њујорк Никс 125:114 (1-2)
Лос Анџелес Лејкерс - Денвер Нагетс 105:112 (0-3)
