Руската амбасада во Бугарија соопшти дека бугарските власти дозволиле авионот на рускиот министер за надворешни работи Сергеј Лавров да прелета низ бугарскиот воздушен простор за да пристигне на самитот на ОБСЕ во Македонија, пренесуваат медиумите во регионот.
„Да, потврдуваме“, изјавија од руската амбасада за РИА на прашањето дали е вистина дека Бугарија дозволила авионот на шефот на руската дипломатија да прелета.
Портпаролот на Европската Унија, Петер Стано, претходно изјави дека дозволата за прелет на руското Министерство за надворешни работи не претставува кршење на антируските санкции.
Состанокот на министрите за надворешни работи на 57-те земји членки на ОБСЕ ќе се одржи во Скопје од 30 ноември до 1 декември на барање на претседавачот со ОБСЕ и министер за надворешни работи на Северна Македонија, Бујар Османи.
Москва објави дека рускиот министер за надворешни работи Сергеј Лавров и американскиот државен секретар Ентони Блинкен нема да се сретнат на состанокот на ОБСЕ во Македонија оваа недела, пренесе Reuters.
Лавров претходно изјави дека ќе им се придружи на министрите за надворешни работи на Организацијата за безбедност и соработка во Европа (ОБСЕ), која ги вклучува Канада и Соединетите држави, во Скопје, доколку Бугарија му го отвори својот воздушен простор.
Тој посочи и дека некои западни земји побарале средби со него.
Од руската инвазија на Украина во февруари 2022 година, средбите во живо меѓу руските министри и министрите на западните земји се ретки.
Заменик-министерот за надворешни работи на Русија, Сергеј Рјабков, изјави дека Вашингтон не побарал средба, „нема да побара и нема да има средба“, пренесува Тасс.
