Проблемите се зголемуваат, неговиот најголем сојузник во соблекувалната и понатаму се обидува да ги смири страстите, но очигледно е дека конфликтот станува видлив. Дали Зидан е способен да ја реши оваа ситуација?
Кристијано Роналдо на една страна, поголемиот дел од играчите на друга.
Ова најмногу се однесува на младите играчи, предводени од Иско.
Последниот конфликт изби откако Португалецот му најде примедба на шпанскиот репрезентативец, бидејќи веднаш не му се заблагодарил за асистенцијата, иако ниту самиот Кристијано тоа никогаш не го прави.
Наводно, Иско, Васкез, но и останатите млади фудбалери веруваат дека Роналдо изминатите години инсистирал тие да бидат продадени, бидејќи не ги задоволуваат критериумите на клубот, а тие исто така веруваат дека токму поради Роналдо, Марко Асенсио не добива повеќе минути на теренот.
Шпанските медиуми се полни со приказните околу фактот дека Роналдо и Бензема не даваа голови во првенството и дека тоа е причина што Реал е далеку од одбрана на титулата, но и дека Зидан не менува ништо.
Во овој момент, клучен фактор е Серхио Рамос. Тој не се согласува со Роналдо дека повредите се главна причина за лошите резултати.
„Тоа е алиби, победувавме и минатите сезони со повредени играчи, па и без Роналдо. Оние кои играат се најдобри и не можеме да бараме причини, повредите се составен дел“, вели Шпанецот.
Тој и понатаму е тампон зона меѓу младите играчи и Роналдо.
„Не е битно кој дава голови, Бензема и Роналдо ќе проработат. На Кристијано му е тоа важно и поради индивидуалните награди, на мене ми е сеедно, не правам разлика меѓу моите и головите на другите“, јасен е лидерот во соблекувалната.
Многумина веруваат дека Зидан не е способен да ги смири страстите, тој и понатаму верува во Бензема, но и нема некој избор, дозволи Мората да замине, а и пропушти да го доведе Мбапе.
Анализите покажуваат дека на крајот на сезоната ќе го плати данокот за тоа, но што се однесува до Роналдо, ако тој не дава голови, проблемите ќе бидат уште поголеми, но ако ги повтори работите од минатата пролет, тогаш веќе ќе се знае кој е главен.
Во секој случај, не постои шанса да си замине од клубот, ниту пак тој сака да замине до 2021 година, кога се верува дека ќе го замени Нејмар.