На глобалните берзи цените на нафтата минатата недела пораснаа, вторпат по ред, за приближно 3 отсто, бидејќи трговците очекуваат зголемување на побарувачката на „црното злато“ во вториот дел од годината.
![](/sites/default/files/styles/article_image_xxl/public/2023-07/bbc03f34-0924-4192-afc8-ba10b8c0a83e.jpg?itok=nB6H1XTI)
На лондонскиот пазар цената на барелот минатата недела порасна за 3,2 отсто, на 85,24 долари, додека на американскиот пазар цената на барелот порасна за 2,8 отсто, на 80,73 долари.
Растот на цените втора недела по ред се должи на проценките дека побарувачката ќе се зголеми во вториот дел од годината.
Организацијата на земјите извознички на нафта (ОПЕК) одлучи благо да го зголеми производството кон крајот на годината, проценувајќи дека побарувачката треба да закрепне - оваа година да се зголеми за нешто повеќе од два милиони барели дневно.
И Меѓународната агенција за енергија (IEA) очекува раст на побарувачката, но половина послаб.
Во САД, најголемиот светски потрошувач на нафта, започна летната сезона на патувања, а аналитичарите на инвестициската банка Goldman Sachs проценуваат дека пазарот во третиот квартал ќе биде во дефицит од 1,3 милиони барели дневно.
На зајакнување на побарувачката упатува и фактот што залихите на нафта во САД минатата недела се намалија за 2,5 милиони барели, а потрошувачката, според податоците за снабдување на бензинските пумпи, се зголеми за 1,9 милиони барели дневно.
„Цените ова лето би можело да бидат поддржани со сезонско зголемување на побарувачката, разгорување на конфликтот меѓу Израел и Хезболах и сезоната на урагани“, објаснуваат аналитичарите на City.
Од друга страна, повисокиот раст на цените беше запрен со пораките на низа челници на американската централна банка дека нема да брзаат со намалување на каматните стапки, бидејќи инфлацијата во САД сè уште е далеку над целните нивоа на ФЕД од 2 отсто.
И повисоките каматни стапки значат дека ФЕД се обидува да го забави растот на побарувачката и економијата, што може да има негативно влијание врз побарувачката на нафта.
Главно поради геополитичките тензии на Блискиот Исток, цените на нафтата се во пораст во однос на почетокот на годината - на лондонскиот пазар речиси 11 отсто, а на американскиот околу 12 отсто.