Претседателот на УЕФА Александер Чеферин гостуваше на HTV и откри некои детали за контроверзната Суперлига.
„Знаев дека морам да настапам што поагресивно бидејќи моравме да ја укинеме Суперлигата за 48 часа или можеби би имале шанса да им успее. Бев сигурен дека се бориме за вистинската работа. Тие луѓе се милијардери, знаев дека или ќе паднеме или ќе ја срушиме Суперлигата. Имавме и закани и поддршка. Не спиев тие 48 часа, ниту јадев, ниту пиев, но се исплатеше“, вели Чеферин.
Тој за Суперлигата дознал од неговиот близок соработник Звонимир Бобан.
„Заедно патувавме во Швајцарија кога се случуваше тоа. Тој беше многу позитивен, не плачеше и кудеше дека ќе изгубиме сè и ќе ни пропадне фудбалот. Наместо тоа ми рече: Ајде да се кладиме на вечера дека ќе ги срушиш за два дена“, изјави Чеферин.
Словенецот откри како сопствениците на некои клубови му понудиле соработка.
„Ме повикаа некои клубови и ми кажуваа дека ќе се приклучат на Суперлигата за да бидат наши пријатели и да ни даваат информации. Им реков дека ако го направат тоа, во истиот момент, ќе бидат мои непријатели. Тоа е војна“.
Чеферин е убеден дека веќе никому нема да му падне на памет да формира Суперлига ниту таков сличен проект.
„Кога заврши сè, добив повик од еден човек кој сакаше да се формира Суперлигата. Ми рече дека може да ни дадат три и пол милијарди евра за да дозволиме да се формира. Му одговорив дека некој од нас двајца е луд, или тој или јас. Оттогаш никој не ме побара. Во наредните 10 години најмалку никој нема да го спомене ова“, заклучи Чеферин.