Одличното Европско првенство носи бурно трансфер лето за италијанскиот напаѓач и очигледно главоболки за неговиот клуб.
Добрите игри на континенталниот шампионат направија Федерико Кјеза на крајот да се најде и во идеалниот тим, а со тоа и проблеми за неговиот клуб Јувентус на чија адреса веќе почнаа да пристигнуваат „непристојни“ понуди.
Прв јадицата ја фрли премиерлигашот Челси кој понуди вртоглави 100 милиони евра, но управата на „Старата дама“ одби било какви преговори за 23-годишниот крилен напаѓач.
Во окромври лани Кјеза потпиша двегодишен договор со Јувентус, но како позајмен од Фиорентина која за првата сезона инкасираше 3 милиони евра, а за втората треба да добие уште 7. Додатно на тоа, во договорот за позајмица стои дека по истекувањето на тие две години Јувентус е обврзан да го отркупи целосно префрлајќи уште 40 милиони евра на сметката на „Виола“ и уште неколку милиони (максимум 10) како бонуси во зависност од остварувањата на играчот.
Оттука јасно е зошто на Јуве ниту 100 милиони не му одговараат. Кјеза ја има целата кариера пред себе и неговата цена може уште да расте, а со тоа и профитот на Јуве од евентуална продажба после неколку сезони.
