Фудбалерите на Челзи победија на Стемфорд Бриџ во Лондон во рамките на 16-тото коло од Премиер лигата против екипата на Манчестер Сити, со резултат од 2:0.
„Сините“ така на најдобар можен начин им се искупија на навивачите за поразот во минатото коло, а за Сити ова беше прв пораз во сезоната.
Гостите во првото полувреме беа значително подоминантна екипа на теренот. Имаа поголем посед на топката, неколку добри шанси, додека домаќините упатија само еден удар кон гостинскиот гол.
Меѓутоа, тој еден удар беше доволен за да дојдат до водство во последната минута од првото полувреме, кога Канте погоди на асистенција на Азар.
Иако во второто полувреме се очекуваа жестоки напади од Сити и обиди за изедначување, играчите на Челзи беа поопасни и направија повеќе шанси, а во неколку наврати се покажа и голманот на Сити, Едерсон.
Наградата за храбриот натпревар ја подигнаа во 78-та минута кога Луз искористи уште едно додавање на расположениот Азар и ја удвои предноста.
2:0 беше конечниот резултат на денешното дерби со кој Челзи го фати последниот воз во борбата за титулата.
Со денешната победа Челзи се проби на третото место во Премиер лигата, додека Манчестер Сити е на второ место со бод помалку од лидерот Ливерпул.
