Ако сте забележале дека вашите нокти пожолтеле, можеби мислите дека маникир ќе ги спаси. Овој феномен може да биде предизвикан од неколку работи, а понекогаш ќе бара и третман.
Дерматологот Шерин Идрис за магазинот Women's Health наведе четири причини зошто тоа се случува и како да се борите со оваа појава.
Носите темен лак за нокти
Ноктите се порозни. Кога на нив ќе се нанесе лак, особено темен, пигментот може да се апсорбира.
„Железните оксиди во лаковите оксидираат и резултираат со привремена жолта боја на 'рѓа која ќе исчезне со текот на времето“, вели д-р Идрис.
Ако сакате да избегнете жолти дамки на ноктите, а преферирате темни лакови, нанесете проѕирен основен слој пред да ги нанесете.
Имате габи
Ако имате тенденција да користите јавни тушеви, како што се оние во теретана, поголема е веројатноста да добиете габична инфекција на ноктите.
„Спортско стапало може да предизвика ноктите да станат жолто-зелени и на крајот да станат кршливи како креда. Ако се сомневате дека тоа е причината за проблемот, д-р Идрис препорачува да разговарате со вашиот дерматолог.
Пушач сте или имате недостаток на витамин
Иако точната причина е непозната, жолтите нокти најчесто се забележуваат кај оние кои страдаат од хронични белодробни заболувања или слаба функција на црниот дроб, како и кај долгогодишни пушачи, бидејќи ноктите доаѓаат во контакт со чадот од тутун.
„Недостатокот на одредени витамини, како што се Б12 и цинк, исто така може да доведе до промена на бојата на ноктите со текот на времето“, вели докторката.
Некој во вашето семејство има жолти нокти
„Ова е исклучително ретко и е познато како синдром на жолт нокт. Започнува во средните години и е поврзан со жолти нокти на рацете и нозете, отекување на нозете и респираторни проблеми, како што се хронични тешкотии со дишењето“, објаснува д-р Идрис.
Во овој случај, вашите нокти може или не може да се вратат во нормала бидејќи промените се предизвикани од генетска мутација.