Европскиот општ суд денеска ја поништи одлуката на Европската комисија со која беа одобрени шест милијарди евра германска државна помош за Lufthansa за време на пандемијата на коронавирус. Одлуката на ЕК содржи „неколку грешки“, утврди судот.
Комисијата погрешно претпоставила дека Lufthansa не може да се задолжува на финансиските пазари, велат судиите. Пазарната моќ на германската авиокомпанија на одредени аеродроми исто така била погрешно проценета и биле прифатени условите за државна помош кои не обезбедуваат ефективна пазарна конкуренција за авиокомпанијата, утврди судот.
Германската влада ѝ обезбеди на Lufthansa помош од милијарди евра во пролетта 2020 година, која Брисел ја одобри во јуни. Ирскиот Ryanair и германскиот Condor поднесоа жалба на одлуката на ЕК.
Строгите правила на ЕУ за државна помош беа ублажени на почетокот на пандемијата за да им се овозможи на владите да ги поддржуваат компаниите во неволја, но помошта сепак требаше да биде одобрена од Европската комисија.
Најголемата германска авиокомпанија доби финансиска помош од владата, откако ги суспендираше операциите поради пандемиски патувачки ограничувања, заканувајќи им се на десетици илјади работници со отпуштања.
Денешната пресуда не означува крај на судската постапка, бидејќи постои можност за жалба до Второстепениот европски суд, потсетува dpa.