Тони Крос веќе се пензионира најавувајќи дека ќе му се посвети на клубот, а медиумите од Хрватска велат дека притисок сега се прави врз Лука Модриќ.
Светскиот вицешампион Хрватска разочара на Европското првенство и го заврши учеството во осминафиналето, а јавноста прстот го впери кон селекторот Златко Далиќ.
Сепак, без оглед на неуспехот, ова не значи крај на одличната генерација, бидејќи никој од играчите не објави повлекување од националниот тим. Сите планираат да останат со Хрватска, дури и капитенот Лука Модриќ, иако наводно има притисок врз него да ја промени одлуката.
Според пишувањата на шпанска Marca, Реал Мадрид го известил Модриќ дека би било добро ако ја заврши репрезентативната кариера, исто како што направи неговиот соиграч Тони Крос.
Модриќ е пет години постар од Крос, а пресметката на Реал Мадрид е јасна - да помине што е можно помалку во Хрватска.
„Лука Модриќ дебитираше за Хрватска во 2006 година, кога имаше само 20 години. Денес има 35 години и е недопирлив лидер на Балканците, кои ги предводеше до најголемиот успех во историјата, светско сребро во 2018 година. Неговата посветеност на Хрватска е несомнена и неговата цел е да престане да игра за националниот тим по Светското првенство во 2022 година. Сепак, ситуацијата на Модриќ е специфична...“, пишува Marca.
„Тој го продолжи договорот до летото 2022 година, а Светското првенство е половина година подоцна. Големото прашање е што ќе стори Модриќ во тие шест месеци од предвидениот крај на кариерата до Светското првенство каде што планираше да се збогува до Хрватска?“.
Се додава дека „не е мал бројот на оние во Реал кои бараат Модриќ да ја напушти Хрватска“, но неговиот одговор секогаш бил ист - и тој не размислува за тоа. Во исто време, тој игра одлично и за Реал и за репрезентацијата, па аргументите се на негова страна.
