Научниците од универзитетот во Калифорнија, во новата студија анализирале повеќе од 600.000 менструални циклуси на повеќе од 124.000 жени. Резултатите покажале дека само 13 отсто од жените имаат циклус кој трае 28 дена, а во просек менструалниот циклус на жените трае 29, 3 дена. На 65 отсто од учесниците во студијата циклусот им трае помеѓу 25 и 30 дена.
Просечната должина на фоликуларната фаза на циклусот (помеѓу крајот на менструацијата и овулацијата) е 16,9 дена.
Просечната должина на лутеалната фаза (од овулацијата до почетокот на следната менструација) е 12,4 дена.
Научниците исто така откриле дека должината на менструалниот циклус може да биде под влијание на возраста на жената и индексот на телесна маса.
Во просек, должината на циклусот се намалува за 0,14 дена годишно од 25 на 45, според студијата, а просечната фоликуларна фаза се намалува за 0,19 дена годишно.
Од друга страна, просечната варијација на должината на циклусот кај жените со покачена телесна тежина е 0,4 дена.
„Обично тоа е 28-дневен циклус, но нашата студија покажува дека таков циклус имаат мал број жени, додека други имаат многу пократок или подолг циклус“, вели авторката на студијата, професорката Џојс Харпер.
Научниците велат дека овие откритија би можеле да им помогнат на жените подобро да ја разберат бременоста, кога имаат поголеми или помали шанси да затруднат.
„Овулацијата не се случува строго на четиринаесеттиот ден, затоа е важно за жените што планираат бременост да го знаат тоа“, вели професорката Харпер.
