Многу се зборува на темата на кој родител личи бебето, дали ги има очите на мајката или на таткото. Се прават споредби од сите страни, но она што науката го вели е дека кога станува збор за интелигенцијата, тоа децата го наследуваат од мајката.
Мајчините гени можат да одредат колку децата ќе бидат паметни, додека татковците не влијаат на нивото на нивната интелигенција, покажуваат истражувањата.
Имено, жените имаат поголема веројатност да ги пренесат гените за интелигенција на своите деца бидејќи тие се пренесуваат на X хромозомот, а жените имаат два такви хромозоми, додека мажите имаат само еден.
Се верува дека интелигенцијата е меѓу гените во прашање, кои мораат да почнат од мајката, а лабораториските студии кои користеле генетски модифицирани глувци открија дека оние со додадена доза мајчин ген развиле поголеми глави и мозоци, но имале помали тела. Оние со додадена доза таткови гени имале помал мозок, но поголемо тело.
Истражувачите идентификувале клетки кои содржат само мајчини или само таткови гени во шест различни делови на мозокот на глувците кои ги контролираат когнитивните функции, од навики во исхраната до помнењето.
Клетките со таткови гени се акумилирале во деловите на лимбичкиот систем, кој е вклучен во функциите како што се секс, храна и агресија. Меѓутоа, истражувачите не пронашле никакви таткови клетки во мозочната кора, каде се одвиваат најнапредните когнитивни функции, како што се расудување, мисли, говор и планирање.
Сепак, истражувањето јасно покажува дека генетиката не е единствена одредница за интелигенцијата - се проценува дека само 40 до 60% од интелигенцијата е наследна, додека останатиот дел зависи од опкружувањето.
