Францускиот селектор остана заклучен на терасата од хотелот во Букурешт, па мораше да вика за помош.
Утревечер во романската престолнина се среќаваат Франција и Швајцарија во рамките на осминафиналето од ЕУРО 2020, а воочи натпреварот селекторот на Французите успеа да се заклучи на терасата од хотелот Hilton Athenaeum каде што е сместена репрезентацијата.
Својата магнетна хотелска картичка заборавил да ја понесе со себе кога одлучил да ја разгледа терасата на кровот од хотелот, па останал заробен со панорамскиот поглед на Букурешт.
На немоќниот Дешам не му останало ништо освен да вика за помош кон групата навивачи кои биле собрани пред хотелот. Навивачите ја информирале хотелската рецепција за необичниот настан, по што Дешам бил ослободен.
