Американскиот CNN објави листа од 12 дестинации кои би требало да ги избегнувате во 2018 година, а меѓу нив се и Венеција, Барселона и Дубровник.
Листата е составена врз основа на тоа што во последните 12 месеци поединечни популарни туристички дестинации настојуваа да го намалат бројот на туристи, за кои тврдеа дека ги преплавиле улиците или ги нарушиле нивните кревки екосистеми, што претставува дилема за патниците кои планираат одмор.
Поради тоа CNN состави список од градови за кои туристите треба да размислат, пред да се одлучат да ги посетат.
На списокот се најдоа градови како Венеција, Барселона, островот Скај во Шкотска, островот Галапагос, Таџ Махал во Индија, Санторини во Грција, Монт Еверест, Бутан, Антарктик, Мачу Пикчу во Перу и пет познати населби во Италија.
Она што е заедничко за сите дестинации е дека поради големиот број на туристи започнала да „пука“ инфраструктурата, а локалното население започнало да се соочува со проблеми од се поголемиот број на посетители.
Во Барселона биле организирани дури и протести против пренатрупаноста на тој град, додека Дубровник најави дека ќе го ограничи бројот на туристи на дневно ниво на 4.000.
Од Унеско дури му се заканија на Дубровник дека ќе му го одземат статусот на светско наследство поради големиот број на туристи.
Во Венеција, поради големиот број на туристи, голем број на локалното население се иселило.
Во Бутан локалните жители се загрижени поради загрозеност на животната средина.
На Галапагос, властите сакаат да го ограничат бројот на туристи за да заштитат игуани.