Властите во САД го укинаа дипломатскиот имунитет на руската мисија во САД и воспоставија контрола врз Трговското претставништво на Русија во Вашингтон. Шефот на ова претставништво во САД Александар Стадник ја потврди информацијата.
Министерството за надворешни работи на Русија подоцна објави снимки од претресите во Генералниот конзулат на Русија во Сан Франциско и во Трговското претставништво на Русија во Вашингтон.
На снимките може да се види како возила и агенти на ФБИ влегуваат на територијата на овие установи. Соработници на специјалните служби почнаа со претреси и на просториите и становите на дипломатските службеници.
Медиумите објавија дека над конзулатот претходно бил забележан чад, поради што се шпекулира дека „Русите палеле документи“. Стејт департментот не ги коментираше ваквите информации.