Официјалната веб страница за имиграција во Нов Зеланд објави мапа со факти за палестинските мигранти и го прикажа Израел обележан со сина боја и означен како Палестина. Тука почнаа проблемите.
Откако беше забележана мапата, реагираше Израелскиот институт во Нов Зеланд.
„Фактите за состојбата на квотите на палестински бегалци претставува еднострана, искривена и исполитизирана приказна за израелско-палестинскиот спор и целосно го брише Израел од мапата“, беше објавено на Twitter профилот на Институтот.
Во спорниот дел од мапата не е вкучен Западен Брег.
Институтот побара од министерот за имиграција да излезе со „извинување за навредливата мапа и да потврди дека тоа не ја одразува политиката на владата на Нов Зеланд“. Исто така побара отворање на истрага за утврдување на одговорност.
Директорот на Институтот рече дека мапата е „неверојатно навредлива“ и ја спореди со мапата на Велика Британија на која новозеландското Министерство за имиграција ги отстрани Шкотска и Велс и ги означи британските острови како Англија.
На мапата Источен Ерусалим се наведува како „назначен главен град“ на Палестина, а во документот се наведува „огромната репресија на Палестинците што ја врши Израел“.
Исто така се укажува на економските санкции и блокадата на Појасот Газа.
Иронично, Нов Зеланд е земја што често се заборава на мапите.
Шведската компанија IKEA во февруари мораше да се извини откако почна продажба на мапи на кои не беше обележан Нов Зеланд.
