Откако актерката Еван Рејчел Вуд го обвини поранешниот свршеник Мерилин Менсон дека сексуално, психички и физички ја малтретирал додека биле во врска, се огласи и поранешната сопруга на музичарот, моделот и бурлескна танчарка Дита фон Тиз.
„За сите што се загрижени за мене, ја ценам вашата љубезност. Треба да знаете дека деталите што излегоа во јавноста не соодветствуваат на моето лично искуство во седумгодишната врска со Менсон. Да беше така, немаше да се омажам за него во декември 2005 година. Раскинавме поради неверство и злоупотребата на дрога“, напиша Фон Тиз на својот Instagram.
„Во една врска нема место за никаков вид на злоупотреба. Ги повикувам сите што претрпеле злоупотреба да преземат чекори за да се опорават и да имаат сила да целосно да се реализираат. Ова е мојата единствена изјава по ова прашање“, додаде таа.
За потсетување, Вуд на својот Instagram откри дека Менсон, чие вистинско име е Брајан Ворнер, наводно бил насилен кон неа во текот на нивната тригодишна врска.
„Почна да ме ‘воспитува’ кога бев тинејџерка и ужасно ме злоупотребуваше со години. Ми го испра мозокот и ме изманипулира да му бидам покорна. Доста ми е од живот во страв од одмазда, клевета или уцена. Тука сум за да го разоткријам овој опасен човек и да ги прозивам бројните индустрии што му го овозможија тоа, пред да уништи и нечии други животи. Стојам на страната на многу жртви кои веќе нема да молчат“, стои во објавата.
Менсон ги нарече обвинувањата за насилство – „страшно искривување на реалноста“.
