Со летниот сонцестој, на северната хемисфера на Земјата денеска почнува летото.
Најдолгиот ден во годината, или летен солстициј (или сонцестој), официјално го означува првиот ден од летото.
Летото оваа 2023 година ќе трае 93 дена, 15 часа и 52 минути.
Зборот сонцестој е всушност македонски превод на solstitium (солстициј), збор што исто така се користи кај нас. Зборот солстициј е изведен од латинските зборови sol (Сонце) и sistere (да стои). Терминот солстициј се користи и во поширока смисла и го означува денот кога се јавува оваа појава. Солстициј е најдолгиот ден во годината (лето) или најкраткиот ден во годината (зима) на сите места надвор од тропските предели. Ова е резултат на навалувањето од 23,4 степени на оската на Земјата кон Сонцето, што предизвикува различни региони на планетата да примаат различни количини на сончева светлина.
За време на јунскиот солстициј, северната хемисфера е навалена кон Сонцето многу повеќе отколку било кој друг ден во годината, што значи дека овој ден луѓето што живеат на северната хемисфера уживаат во најдолгиот ден и најкратката ноќ во годината.
На денот на летниот сонцестој, северната хемисфера добива повеќе сончева светлина отколку во кое било друго време од годината, но тоа не значи дека првиот ден од летото е најтопол. Иако планетата ќе добие најмногу сончева светлина во текот на денот, потребни се недели за да се почувствува таа топлина, па најтоплиот период од годината обично е во јули или август.
Често погрешно мислиме дека Земјата за време на летото, а особено за време на летниот сонцестој, е поблиску до Сонцето отколку во останатите денови во годината. Но, тоа не е точно. Всушност, навалувањето на Земјата има поголемо влијание на годишните времиња отколку оддалеченоста на нашата планета од Сонцето.
На летниот сонцестој долго време му била давана посебна важност во многу различни култури. Така, Египќаните ги изградиле пирамидите во Гиза на тој начин што Сонцето на денот на летниот сонцестој се наоѓа точно помеѓу две пирамиди.
Археолозите исто така имаат откриено и остатоци од астрономска опсерваторија во град на Маите во денешна Гватемала, во кој зградите се изградени во склад со Сонцето за време на сонцестојот.