Ново истражување на Универзитетот Сајмон Фрејзер од Канада додаде дополнителна тежина на аргументот дека долготрајното седење може да биде опасно за човечкото здравје.
Меѓународна студија анкетира повеќе од 100.000 луѓе од 21 земја и откри дека оние кои седат 6 до 8 часа дневно имаат за 13 проценти зголемен ризик од рана смрт и срцеви болести, додека кај оние кои седат повеќе од 8 часа дневно ризикот се зголемува до 20 проценти.
Студијата е водена од професори на споменатиот универзитет и професори од Кинеската академија на медицински науки во Пекинг. Резултатите се објавени во Jama Cardiology.
Истражувањето го следело животот на поединците во текот на 11 години и утврдено е дека долготрајното седење е поврзано со зголемен ризик од прерана смрт и кардиоваскуларни болести. Додека седењето е проблематично во сите земји, се покажа дека е најголем проблем во земјите со низок и понизок приход.
„Пораката е дека треба да се намали времето минато во седење. Ако веќе мора да седите, во вториот дел од денот вежбајте и така ќе го надополните тој ризик, советува професорот Скот Лир од Универзитетот Сајмон Фрејзер.
Воопшто не е чудно што оние кои најмногу седат и биле најмалку активни имаат поголем ризик, до 50 проценти, додека оние кои најмногу седеле, а биле најактивни имале значително помал ризик од 17 проценти.
„За оние кои седат повеќе од 4 часа дневно, замената од половина час седење со вежбање би го намалила ризикот за 2 проценти“, вели професорот Лир. „Со оглед дека само еден од четири Канаѓани ги исполнуваат препораките за активност, постои добра причина луѓето да ја зголемат својата активност и ги намалат шансите за рана смрт и срцеви болести“, додава тој.
Докторите препорачуваат помалку седење и повеќе активности бидејќи тоа е евтина интервенција која може да има огромни предности. Но, првин, луѓето мора сериозно да го сфатат своето здравје.
„Нашата студија покажа дека комбинацијата од седење и неактивност предизвика 8,8 проценти од сите смртни случаи што е близу придонесот од пушење (10,6 проценти во студијата на Лир). Тоа е глобален проблем кој може многу едноставно да се реши. Ставањето потсетник за станување од столчето е одлично за почеток“, советува професорот.
