Поранешниот претседател на САД Доналд Трамп и неговата сопруга Меланија се вакцинирале против COVID-19 во јануари, уште додека беа во Белата куќа, велат извори блиски до поранешното прво семејство.
За разлика од Џо Бајден, кој се вакцинираше на 21 декември во пренос во живо на ТВ неколку недели пред да дојде на власт, Трамп никогаш јавно не спомна дека е вакциниран.
„Претседателот Трамп и првата дама беа вакцинирани во Белата куќа во јануари“, изјави извор близок на поранешниот претседател за France Presse, без да даде други детали.
Завчера Доналд Трамп, во својот прв говор по напуштањето на Белата куќа, рече „сите треба да бидат вакцинирани“.
Неговите изјави добија особено значење затоа што некои од неговите симпатизери имаа големи сомнежи за вакцината против коронавирусот.
Доналд Трамп, кој беше позитивен на COVID-19 на почетокот на октомври, помина неколку дена во воената болница Валтер Рид во предградие на Вашингтон.