Осумнаесетгодишниот голман на Милан Џанлуиџи Донарума одби да го продолжи договорот бидејќи чувствуваше закани од клубот, а не од финансиски причини, рече неговиот менаџер Мино Раиола.
„Згрешив што не ја прекинав веднаш оваа пеколна машина. Не можевме да се согласиме под такви удари. Донесовме одлука каква што не сакавме да нонесеме. Не се работи за пари. Ни се закануваа“, рече Раиола.
Донарума на 16 години влезе во првиот тим на Милан и одигра 70 натпревари за клубот што соопшти дека нема намера да го продаде и исто така негираше дека одредени членови му се заканувале на голманот дека нема да игра ако не го продолжи договорот.
„Нашата позиција е непроменета, Донарума не е на продажба и ќе игра следната сезона за Милан. Сепак, не можеме да ризикуваме, па мора да бараме нов голман“, рече Марко Фасоне, извршен директор на Милан.
Фасоне исто така ги негираше тврдењата на Раиола и додаде дека ако Донарума се премисли, клубот, а евентуално и навивачите, ќе ја пречекаат таквата одлука „со раширени раце“.