Тешка сообраќајна несреќа се случи на експресниот пат Штип-Радовиш на дваесеттиот километар. Според првичните информации несреќата е со жртва.
Портпаролот на СВР Штип, Гордана Панајотова за МИА ја потврди информацијата и вели дека станува збор за возач на едно од возилата, кои учествувале во несреќата. Подоцна додаде дека е потврден идентитетот на возачот, кој управувал со возилото со радовишки регистарски таблички и оти станува збор за лицето М.В. од Радовиш.
Во несреќата, која се случи во 14:39 учествуваа две возила, според првичните информации станува збор за директен судир меѓу возило со радовишки таблички и скопско товарно возило. Повредни се и две други лица во несреќата. Станува збор за возачот и сопатник од возилото со скопски регистарски таблички. Портпаролот на Клиничка болница Штип, Марина Шуманска, потврди дека повредените по направените прегледи се пуштени дома.
Сѐ уште е во тек увидот на местото на несреќата на експресниот пат Штип-Радовиш кај дваесеттиот километар. Штипските пожарникари биле повикани да интервенираат, со пепе апарати гаснеле едно од возилата, кое можело да се запали од силината на директниот судир. Оваа делница од клучката за Неготино, до клучката кај Бучим е затворена за сообраќај, а возилата се пренасочуваат да се движат по стариот регионален пат Штип-Радовиш преку Пилав Тепе.
