Скоро една година откако лекарите ги идентификуваа првите случаи на коронавирус во кинескиот град Вухан, се добива впечаток дека Кина сака повторно да го испита потеклото на болеста.
Државните медиуми интензивно известуваат за најденото присуство на коронавирус на пакувања увезена замрзната храна и за испитување на можни случаи на болеста откриени надвор од Кина пред декември 2019 година.
People’s Daily објави дека „сите достапни докази покажуваат дека коронавирусот не започнал во Вухан“.
„Коронавирусот првпат беше откриен во Вухан, но тоа не е местото на потекло“, рече Зенг Гуанг, поранешен главен епидемиолог во Кинескиот центар за контрола и превенција на болести, пишува весникот.
Портпарол на Министерството за надворешни работи, на прашање за објавите на државните медиуми дека вирусот потекнува од Кина, рече само дека е важно да се направи разлика каде првпат е откриен SARS-CoV-2 и каде ја преминал бариерата меѓу видовите за да зарази луѓе.
„Иако Кина прва пријави случаи, тоа не мора да значи дека вирусот потекнува од Кина. Откривањето на потеклото е тековен процес што може да вклучува повеќе земји и региони“, рече Џao Лиџијан.
Кинески научници дури му доставија на The Lancet необјавен документ во кој се тврди дека „Вухан не е местото каде вирусот SARS-CoV-2 преминал од човек на човек“, што сугерира дека првиот ваков случај можно е да се случил „на индискиот потконтинент“.
Мајкл Рајан, директор на Програмата за вонредни ситуации на Светската здравствена организација (СЗО), минатата недела изјави дека би било „крајно шпекулативно“ да се тврди дека болеста не се случила во Кина, пренесува The Guardian.
Што се однесува до објавата во која се сугерира дека вирусот SARS-CoV-2 циркулирал во Италија есента 2019 година, се наведува дека ова може да биде поврзано со други коронавируси освен овој новиот (SARS-CoV-2) што се појави во Вухан.
„Она што се чини сигурно е дека првите регистрирани случаи на заболување биле во Кина и затоа е веројатно дека вирусот потекнува од Кина“, вели вирусологот Џонатан Стоје.