Жирона е најголем хит во Европа бидејќи е на второто место во Ла Лига, а нивните играчи со своите потези ја полудеа цела Шпанија.
Заедно со најдобриот стрелец на лигата, Артем Довбик, најголемо внимание привлекува и 19-годишниот крилен напаѓач Савиу Морејра џи Оливејра.
Бразилецот на 23 натпревари во Ла Лига постигна 5 гола и 7 асистенции, а со својот дриблинг ги излудува противничките дефанзивци.
Фабрицио Романо синоќа ексклузивно објави дека Савиу од следната сезона ќе игра во Манчестер Сити, а таа вест не треба никого да изненади.
Жирона во суштина беше дизајнирана да биде филијала на Сити во Шпанија, а судејќи според сезонава, експериментот на богатите шеици успеа.
Да потсетиме, Жирона е дел од City Football Group во сопственост на шеикот Мансур, кој покрај Манчестер Сити и Жирона ги поседува и австралискиот Мелбурн Сити, индискиот Мумбај Сити, американскиот Њујорк Сити, уругвајскиот Монтевидео Сити Торке, белгискиот Ломел, кинескиот Сичуан Џиуниу, јапонскиот Јокохама Ф·Маринос, италијанскиот Палермо, бразилскиот Баиа и францускиот Троа.
Токму од последниот клуб на оваа листа Савиу е позајмен во Жирона.