Фудбалерите на Барселона одиграа спектакуларен натпревар во Ел Класико и го совладаа најголемиот ривал Реал Мадрид со 4:0.
Препородените Каталонци играат фантастично под водство на Чави Ернандес и да не беше големата разлика во бодови од првиот дел од сезоната, лесно можеа да се вклучат во борбата за титулата во Шпанија.
Синоќа во Ел Класико убедливо го победија најголемиот ривал. Реал прв се закани преку Феде Валверде, чиј удар во 7. минута го одбрани Марк-Андре тер Штеген.
Барселона возврати со две шанси преку Усман Дембеле и Пјер-Емерик Обамејанг, а потоа Феран Торес имаше две шанси во средината на првото полувреме.
Во 29. минута гостите поведоа. Дембеле упати одличен центаршут по умешното додавање од десната страна, а Обамејанг погоди со глава за водство на гостите.
Финишот на првото полувреме донесе уште еден гол за Барселона. Дембеле повторно добро центрираше, а овој пат со глава биеше Роналд Араухо.
Второто полувреме беше отворено со одличната шанса која ја пропушти Торес во 46. минута. Поранешниот фудбалер на Манчестер Сити конечно се искупи за промашувањата во следниот напад, бидејќи погоди за 0:3.
Во 53. минута беше јасно дека Реал е декласиран. Обамејанг постигна нов гол, а по проверката на ВАР судијата се премисли и го призна голот иако првично беше поништен.
По тој гол беше јасно дека Реал нема да се врати. Домашните немаа идеја, ниту пак момент да го загрозат противничкиот гол.
Дембеле синоќа можеше да го постигне и петтиот гол за Барселона, но промаши гол во 74. минута кога излезе сам пред Тибо Куртоа.
Остана 0:4, па Барселона се врати на 3. место со 12 бода помалку од Реал, но и натпревар помалку. Првопласираниот Реал сега има 9 бода повеќе од Севиља.