Аргентинскиот голман Емилиано Мартинес се најде во центарот на вниманието на Мундијалот поради одличните настапи на теренот, но и поради недоличното однесување на доделувањето на трофеите и ќе ги сноси последиците за тоа.
Откако ја прими наградата за најдобар голман на Мундијалот во Катар, со непристоен потег ги шокираше сите присутни на стадионот, но и оние што гледаа дома, кога наградата ја стави пред меѓуножјето.
На теренот со одличните одбрани беше еден од најважните играчи за титулата светски првак, но наместо Мундијалот да ги отвори вратите за поголемите клубови, контроверзниот голман со овој потег сам си ја затвори вратата.
Тренерот на Астон Вила, Унаи Емери, го критикуваше за недоличното прославување на титулата, а шпанскиот портал Fichajes пишува дека тој веќе одлучил да го продаде.
„Кога емоциите се силни, тешко е да се контролираат. Сепак, следната недела ќе разговарам со него за начинот на кој славеше. Сега тој е со својата репрезентација и го почитувам тоа, но кога ќе дојде во клубот, тоа е наша одговорност“, изјави Емери пред неколку дена.
Сепак, се чини дека разговорот ќе биде само формалност, а Мартинес веќе во зимскиот преоден рок ќе менува клуб. Интересно, на голот на Астон Вила треба да биде заменет со друг голман кој се прослави во Катар - Мароканецот Јасин Буну. Севиља за него бара 40 милиони евра, што е сосема прифатлива цена за Астон Вила.
