Дуелот меѓу фудбалските репрезентации на Турција и Ерменија во Ескишехир мина во напријателска атмосфера поради политичките тензии меѓу двете земји, а почна уште со интонирањето на химните.
Како гостинска репрезентација прво беше интонирана химната „Մեր Հայրենիք“ (Наша татковина) на Ерменија, а турските навивачи на преполниот „Јени Ескишехир“ стадион громогласно ја исвиркаа поради што химната речиси и да не се слушаше. Само со движењата на усните на ерменските фудбалери можеше да се заклучи дека е во тек интонирањето на нивната национална химна.
Ваквите сцени не се изненадувачки со оглед на добро познатите превирања во историјата меѓу двете земји. Ерменците ги обвинуваат Турците за геноцид извршен за време на Првата светска војна, а познато е дека Турција е сојузник на Азербејџан, кој е во конфликт со Ерменија за спорниот регион Нагорно-Карабах.
Инаку, натпреварот заврпи 1:1 на разочарување на домашната публика.
Исвиркувањето на националните химни на стадионите ширум Стариот континент е редовна пракса кога се среќаат држави што се во политички конфликт. Лани слична слика имаше на Националната Арена „Тодор Проески“ во Скопје кога гостуваше репрезентацијата на Бугарија, а исвиркуватања од целиот стадион ја загушија мелодијата од бугарската химна.
УЕФА редовно изрекува казни за ваквото однесување на публиката, но тие немаат ефект бидејќи се казнуваат фудбалските федерации, кои немаа влијание врз публиката.
