Еврокомесарот за внатрешен пазар, Тјери Бретон, вели дека воопшто не се сомнева во ефикасноста на Спутник V со оглед на тоа што руските научници се одлични.
ЕМА сѐ уште не ја одобрува употребата на руската вакцина во ЕУ, па поради тоа Бретон беше прашан за негово мислење за Спутник V.
„Се разбира дека Спутник е веројатно добра вакцина бидејќи верувам дека Русите се навистина добри научници. А, се разбира, немам ниту една причина да се сомневам во тоа“, рече тој.
Додаде и дека се надева дека наскоро четирите одобрени вакцини во ЕУ ќе пораснат на пет, токму со Спутник V.
„За Европа е важно да има на располагање различни врсти на вакцини за да може да го заврши процесот на имунизација до крајот на летото“, смета Бретон.
Проблемите за ЕУ настанаа кога британско-шведската компанија AstraZeneca ја намали доставата на вакцини од 90 милиони дози во првиот квартал од 2021 на 40 милиони, а потоа и на 30, правдајќи се на проблеми со производството. Тоа значително ја намали брзината на вакцинација на Стариот континент.
Од земјите-членки на ЕУ досега Спутник ја употребуваат само Унгарија и Словачка, Италија веќе нарача дози, додека истото најави дека ќе го стори и Грција. Од останатите европски земји, руската вакцина е во употреба во Белорусија, Босна и Херцеговина, Сан Марино, Северна Македонија, Србија и Црна Гора.
Освен вакцината на AstraZeneca, со која во последно време многу земји ја стопираа вакцинацијата, ЕМА ги има одобрено и вакцините на Pfizer/BioNTech, Moderna и Janssen (европската филијала на Johnson & Johnson).