Европските производители на оружје побараа помош од Европската Унија за приспособување на производствениот капацитет во „мирнодопски услови“ на ненадејниот скок на побарувачката, истакнувајќи го проблемот со недостигот на работна сила. Велат дека се шокирани од развојот на ситуацијата.
Вооружената индустрија всушност очекуваше земјите од ЕУ да трошат помалку, а не повеќе, за одбрана по една деценија мир во Европа, изјавија во вторникот шефовите на производителите на оружје на состанокот пред собирот на министрите за одбрана на НАТО во Брисел. Генералниот секретар на НАТО Јенс Столтенберг рече дека отвориле дијалог со индустријата и сојузниците за зголемување на производството и надополнување на залихите, пренесе Ројтерс.
Министрите за одбрана ќе донесат одлуки за зголемување на залихите, најави Столтенберг на прес-конференција, додавајќи дека нивното намалување за поддршка на Украина е вистинскиот потег.
НАТО најави зголемување на залихите
Но, сега производството мора да се зголеми за да можат сојузниците да ги обезбедат сопствените капацитети и да продолжат да ја поддржуваат Украина на „долгорочен план“, нагласи генералниот секретар на НАТО. Тој, исто така, очекува дека министрите на НАТО ќе усвојат поамбициозни цели кои ќе ја обезбедат долгорочната побарувачка на индустријата и со тоа ќе ги исполнат нејзините услови за долгорочни инвестиции. Ќе размислат и за заеднички набавки, додаде Столтенберг.
Извршниот директор на францускиот производител на оружје Nexter, Николас Шамуси, објаснува дека индустријата морала да одговори на драматичниот скок на побарувачката за воена опрема во ЕУ, а нејзиниот производствен капацитет е дизајниран за мирно време.
Тој им порача на водачите на ЕУ да избегнуваат „повторено фрагментирање на национално ниво“ во трескавична средина диктирана од војна и секоја земја да ги следи своите цели.
„Напротив, овој предизвик мора да се реши на европско ниво“, смета шефот на францускиот производител на оружје, повикувајќи на зајакнување на воените капацитети преку подобра, поефикасна соработка.
Nexter дизајнира и произведува воени возила за француските и меѓународните вооружени сили. Тој е дел од француско-германската KNDS, која е 50 отсто во сопственост на француската држава и 50 отсто во сопственост на семејството Вегман-Груп.
Има недостиг од работници
И директорите на производителите на оружје порачаа дека итно им требаат повеќе работници. Шамуси ја повика ЕУ да помогне во изградбата на „резервоар на труд“, сугерирајќи вработување на работници кои се пензионирале предвремено и ангажирање експерти од други компании.
ЕУ купи опрема за украинската армија, вклучително и смртоносно оружје, кое, според Унијата, треба да се користи за одбранбени цели.
Минатиот петок лидерите на ЕУ одлучија да ја зголемат финансиската и воената помош за Украина. Еврокомесарот за надворешна политика Жозеп Борел изјави дека овој месец ќе се разговара за конкретни предлози, потсетува Reuters.
„За нас, непосредната последица (од руската инвазија на Украина) е барање да вложиме повеќе напор, да работиме побрзо, да испорачаме со побрзо темпо и веднаш“, рече шефот на европскиот производител на ракети МБДА Ерик Берангер. Компанијата е во сопственост на Airbus, BAE Systems и Leonardo.
