Златан Ибрахимовиќ уште еднаш зборуваше за себе како да е од друга планета.
Шведскиот напаѓач Златан Ибрахимовиќ не планира да ја заврши својата играчка кариера иако „зачекори“ во петтата деценија од животот.
Моментално е повреден и навива за Милан од трибините и патем ги „малтретира“ своите помлади соиграчи, а кога му недостасува фудбалот - тогаш се појавува интервју во кое крева бура.
Така, во интервју за францускиот телевизиски канал Canal Plus, Ибрахимовиќ даде еден одговор кој беше доволен за да го има на насловните страници низ Европа.
Од него беше побарано да каже како се чувствува по заминувањето од Париз, каде што не играл од 2016 година и да каже дали му недостига градот... Не размислувал долго пред да „испука“ вирален одговор.
„Откако ја напуштив Франција, немате за што да разговарате... Не ми треба Франција, но јас ѝ требам на Франција. Дури и сега кога имате тројца големи играчи во Пари Сен Жермен како Нејмар, Мбапе и Меси, тоа не помага веќе го немате Бог на теренот“, рече Златан Ибрахимовиќ и со тоа уште еднаш ја продлабочи приказната дека е голем егоист.
„Не размислувам за пензија, мислам дека не е близу крајот. Сè додека можам да постигнам резултати, сакам да играм. Во моментот кога ќе се пензионирам, сакам сите околу мене да бидат искрени и да ми кажат дека веќе не можам да помогнам.Тогаш ќе бидам реален...“.
Златан Ибрахимовиќ ја започна својата кариера во 1999 година во Малме, а потоа играше за Ајакс, Јувентус, Интер, Барселона, Милан, Пари Сен Жермен, Манчестер Јунајтед, Л.А. Галакси и Милан повторно. Во кариерата на клупски план постигна 510 гола. За шведската репрезентација одигра 121 натпревар и постигна уште 62 гола.
