Министерот за здравство Венко Филипче апелира до граѓаните да ги почитуваат во целост мерките и препораките за заштита од коронавирусот.
Почитувањето на мерките ќе овозможи побрз излез од здравствената криза, потенцираат од Министерството, повикувајќи ги граѓаните да се воздржат од групирање и да ја одржуваат потребната дистанца.
„Да ги почитуваме мерките за побрзо да ја надминеме епидемијата со COVID-19. Да одржуваме 2 метри растојание, да носиме заштитна опрема и често да ги миеме и дезинфицираме рацете“, напиша министерот на неговиот Facebook профил.
Потсетуваат дека на вчерашната прес-конференција, министерот за здравство Венко Филипче потенцираше сите граѓани да даваат вистинити и точни информации на надлежните институции, а МВР поинтензивно да врши контроли на терен.