Пикот на коронавирусот во државава го очекуваме за еден месец, на крајот на април. Тоа се проценките на епидемиолозите согласно типот на раст на број на пациенти, но и согласно мерките што беа воведени во изминатиот период, пред сè во рестрикциите на движење, во ограничувањето на социјалните контакти, истакна министерот за здравство Венко Филипче.
Тој посочи дека досега спроведените мерки се сосема доволни и дека полицискиот час, целосното ограничување на движењето, ограничувањето на движењето на повозрасните лица на возраст над 67 години и нивното немешање со лицата на возраст до 18 години е нешто што очекуваат да даде резултат.
– Искрено се надеваме дека овие мерки практично ќе дадат резултат во смисла на тоа и во периодот што следи да немаме експоненцијално зголемување на бројот на пациенти, туку линеарно и после понатаму тој број да се намалува, додаде Филипче, одговарајќи на новинарско прашање по прес-конференцијата во Владата.
Се зголемува бројот на тестираните на дневна основа, бројката на дијагностицираните останува приближно иста
Добро е што бројката на дијагностицирани пациенти останува иста без разлика на тоа што од почетокот досега бројот на тестови се зголемува, порача министерот за здравство Венко Филипче.
– Имаме иста бројка на нови пациенти секојдневно за се поголем и поголем број на направени тестови, рече Филипче во одговор на новинарско прашање на денешната прес-конференција.
Тој посочи дека дневно вкупно се прават помеѓу 200 и 300 тестови во сите лаборатории и приватните и државните.
– Деновиве се вклучи и лабораторијата на Ветеринарниот институт со 30-ина теста, плус во трите приватните институции во секоја поединечно се прават по околу 30 тестови. Сметам дека сега засега имаме сосем доволен капацитет на тестирање, рече Филипче.
Министерот најави донација од 20.000 тестови и 5.000 тестови од една од приватните лаборатории која, како што посочи, ќе ги донира тестовите постепено согласно препораките и индикациите од епидемиолозите.
