Светскиот боксерски првак во тешка категорија Тајсон Фјури изјави дека и самиот бил жртва на расизам.
Првакот во WBC истакна дека не се само луѓето од црната раса изложени на дискриминација и расизам, во контекст на бранот дискусии за дискриминацијата по убиството на Афроамериканецот Џорџ Флојд.
„Јас сум белец, но и сега во 2020 година сум жртва на расизам бидејќи сум чергар. И денеска на вратите на одредени пабови и ресторани пишува дека е забранет влезот за чергари. Не се само луѓето од црната раса изложени на дискриминација и расизам. Уште е прифатливо да се биде расист кон чергарите во Велика Британија и низ светот и никој не презема ништо во врска со тоа. Секој може да биде расист и тоа нема врска со бојата на кожата и потеклото“, рече Фјури во емисијата Good Morning Britain на ITV.
Своето тврдење го поткрепи и со лично искуство:
„Кога го победив Кличко во 2016 година, со сопругата сакавме да влеземе во еден ресторан во Велика Британија, но не ми беше дозволено. Им реков дека сум светски првак во тешка категорија кој ја преставувал својата земја, а не кој било. Ми рекоа дека тоа е неважно бидејќи сум чергар, а на чергарите не им е дозволено да влегуваат во ресторанот“, раскажа Фјури.