Фудбалскиот клуб Тетекс од Тетово со пригодни активности и ревијален натпревар за прв пат од осамостојувањето денес одбележа годишнина од основањето на 18 февруари 1953 година. Од употреба се повлече дресот со број 4 во чест на Бошко Блажевски кој лани почина, а играше 12 сезони во клубот и беше тренер и дел од управата.
Ревијалниот дуел со Брегалница од Штип времено беше запрен во 4. минута во чест на бројот 4. Играчот на Тетекс, Мирослав Јовановски кој го носеше дресот заедно шефот на стручниот штаб Славчо Георгиевски го предадоа дресот на семејството Блажевски.
„Голема чест за нашето семејство. Нека биде поттик за сите спортски работници, за младите и децата, дека сѐ што ќе постигнат во спортот некој ќе им го памти тоа. Дека се возвраќа доброто за добро и дека целта ќе им биде исполнета до крај. Во 70-тите години имаше и проштален натпревар во негова чест кога се повлекуваше од активното играње фудбал, после тоа директно и индиректно вклучен во фудбалскиот клуб Тетекс како тренер, спортски работник во управа, редовно беше дел од клубот. Целиот свој живот го посвети на градот Тетово и ФК Тетекс, има многу кажани и неискажани приказни за неговото фудбалско патување“, изјави синот Зоран Блажевски, инаку придружуван со внуците на Бошко, Дарио и Бобан.
Дресот со број 4 ќе биде во клупските простории. Во ревијалниот дел Тетекс ја совлада Брегалница со 4:0. Тетекс додели благодарници на поединци, групи, спортски работници и медиуми за поддршката што ја даваат на клубот.
Бошко Блажевски почина на 76 години на 7 септември 2020 година. Блажевски својата кариера ја започнал како средношколец во штипска Брегалница, па продолжил една година во Љуботен по што околу 15 години го носел дресот на Тетекс. Блажевски има работено како тренер и спортски новинар. На 18 февруари 1953 е одржано основачкото собрание на клубот кога е формиран од локалниот текстилен комбинат како ФК Текстилец, а подоцна е преименуван во денешното име Тетекс.
Клубот денес се натпреварува во 2.МФЛ Запад откако лани го доживеа најлошиот пласман играјќи во 3.МФЛ Запад. Тетекс во својата историја 4 пати бил шампион на Македонија во тогашната Републичка лига за време на Југославија (1964/65, 1968/69, 1973/74 и 1984/85), еднаш ја освоил втората југословенска лига Исток (1980/81), еднаш 2.МФЛ (2008/09) и 2 пати победил во Купот на Македонија (2009/10 и 2012/13).
