Службите на државата Флорида добиле информација дека „нема загриженост за безбедноста“ поради пукнатината на мостот на Универзитетот во Мајами, само неколку часа пред да се сруши мостот при што загинаа шест луѓе.
Меѓународниот универзитет на Флорида соопшти дека во четвртокот утрото бил одржан состанок со инженеринг и градежните компании, како и Службата за транспорт на Флорида.
Еден од инженерите им рекол на службите дека пукнатината „не го загрозува структурниот интегритет на мостот“.
Мостот се сруши врз осум возила на автопатот под него три часа подоцна.
Во соопштението од Универзитетот, чие дело беше експресно изградениот мост, стои дека одговорниот инженер дал техничка презентација за пукнатината на состанокот што траел околу два часа.
Оваа вест следи откако Дени Пит, водечкиот инженер на мостот, предупредил дека има пукнатина на мостот два дена претходно, преку гласовна порака што ја оставил во Службата за транспорт.
Тој во пораката исто така вели дека смета дека нема причина за загриженост „од безбедносна гледна точка“.
Вработени во Службата вчера рекоа дека ја слушнале пораката дури откако паднал мостот, но не спомнаа дека бил одржан состанок истиот ден, на кој била спомната пукнатината.
Националниот одбор за безбедност при транспорт на САД отвори истрага за утврдување на причината за рушењето на мостот.
„Ако имало пукнатина, тоа не значи дека мостот не бил безбеден“, вели Роберт Ацета, истражител за Одборот.
За сега бројот на жртви изнесува шест, но се стравува дека ќе бидат најдени уште под урнатините од градбата тешка 862 тони што беше изградена неколку дена претходно како пешачки мост за студентите на Универзитетот.
Полицијата рече дека извлечени се три тела и пратени се на идентификување.
Компаниите што работеа на изведбата на мостот рекоа дека ќе пружат целосна соработка во истрагата.