Претседателката на Европската комисија, Урсула фон дер Лајен, денеска најави промени во правилата за државна помош со цел да се спречи бегството на инвеститорите во Соединетите Американски Држави кои обезбедуваат значителни олеснувања за своите производители во областа на зелената транзиција.
„Конкуренцијата е добра, ја поттикнува иновативноста, ја зајакнува ефикасноста и обезбедува напредок, а со тоа ги намалува цените во областа на чистите технологии... Но, во пазарната конкуренција, истите правила мора да владеат за сите“, рече Фон дер Лејен во говор на Колеџот на Европа во Бриж.
Администрацијата на претседателот Џо Бајден усвои инвестициски план од околу 370 милијарди долари, наречен Закон за намалување на инфлацијата (IRA), кој обезбедува големи придобивки за американските производители.
Законот предвидува даночни олеснувања за купувачите на електрични автомобили доколку се произведени во САД, а субвенции би добиле и производителите на батерии за истиот автомобил. Според законот, кој го поттикнува пристапот „купувај американско“, производителите на електрични автомобили имаат голема предност ако прават и купуваат делови за нивните производи во САД.
„Постои опасност IRA да доведе до нелојална конкуренција, до затворање на пазарите и да доведе до фрагментација на патиштата за снабдување кои веќе се ставени на тест за време на пандемијата“, рече Фон дер Лејен.
Претседателката на извршното тело на ЕУ нагласи дека ЕУ мора да усвои мерки што ќе доведат до „балансирање“ и корекција на нарушувањата на пазарот предизвикани од огромните американски субвенции.
„Ние во Европа треба да ја завршиме нашата домашна задача и во исто време да работиме со САД за да ги ублажиме недостатоците на конкуренцијата. Гледам три главни начини да го направиме тоа. Прво, треба да ги прилагодиме нашите сопствени правила за да ги олесниме јавните инвестиции во транзицијата. Второ, треба да ја преоцениме потребата од дополнително европско финансирање за транзицијата. Трето, треба да работиме со САД за да се справиме со некои од највознемирувачките аспекти на американскиот закон“, рече Фон дер Лајен.
Таа рече дека ЕУ треба да ги поедностави и прилагоди своите строги правила за државната помош, така што владите на земјите-членки ќе бидат пофлексибилни кога ги одобруваат субвенциите.
Во исто време, таа предупреди дека ЕУ не треба да се потпира само на државните субвенции, бидејќи тоа ќе доведе до нерамноправна трка во субвенциите во самата Унија, при што некои земји-членки имаат голем фискален капацитет, а други, високо задолжени, имаат многу малку простор за маневрирање во нивните буџети за поттикнување на нивните бизниси.
Затоа, Комисијата се залага за „заеднички одговор“ со зголемено финансирање на ниво на ЕУ.