Иако живееме во свет во кој тензиите меѓу земјите се зголемуваат речиси секојдневно, најмалку што може да се очекува е дека две европски земји ќе влезат во политички конфликт за домати.
Имено, француските политичари во текот на изминатата недела, под притисок на земјоделците кои организираа демонстрации, изразија солидарност со нив и изјавија дека нивните шпански колеги уживаат неправедно подобар статус затоа што подлежат на помалку барани еколошки стандарди.
Пониските еколошки стандарди значат и дека шпанските земјоделци можат да произведуваат овошје и зеленчук по пониска цена.
Со ваквата изјава се согласи и премиерот на Франција, Габриел Атал, кој рече дека не е фер соседните земји да можат да користат пестициди кои се забранети во Франција.
„Лицемерно е да се увезува овошје и зеленчук од оние места кои го уништуваат сопствениот екосистем за да произведуваат“, рече францускиот премиер.
На неговите изјави реагираше и шпанскиот премиер Педро Санчес, кој во четвртокот по вонредната седница на Европскиот совет ги отфрли коментарите на Атал и ги пофали шпанските производи.
„Успехот на нашите производи е резултат на огромниот иновативен напредок на земјоделскиот сектор и напорната работа на шпанските фармери“, рече Санчес.
Тој се осврна и на негативните коментари на поранешната француска министерка за екологија, Мари-Сеголен Ројал, која изјави дека шпанските производи се сметаат за „биолошки лажни“ и дека доматите во таа земја се прогласени за нејадливи.
„Нема сомнеж дека нашите домати се најдобри во светот. Ја поканувам Ројал да дојде во Шпанија и да ги проба нашите домати. Наскоро ќе разберат зошто се без конкуренција“, заклучи Санчес.