Навивач на ПСЖ бил прободен со нож и итно пренесен во болница откако група од 50-ина ултраси на Милан синоќа ги нападнале франциските навивачи во миланската населба Навиљи.
Il Corriere della Sera и La Gazzetta dello Sport известуваат дека еден навивач на ПСЖ е во критична состојба откако бил прободен со нож.
Двата извора велат дека над 50 ултраси од редовите на Курва Суд пристигнале во населбата Навиљи со шлемови и димни бомби за да ги нападнат ултрасите на ПСЖ и обичните фрнацуски навивачи кои седеле во баровите и ноќните клубови. Станува збор за една од најживите населби во Милано.
Навивачот на ПСЖ бил двапати прободен во нога и во болница бил донесен во критична состојба.
Ултрасите на ПСЖ потоа се судриле и со полицијата. Еден полицаец бил прободен, а еден Французин уапсен. Тврд предмет фрлен од навивачите на ПСЖ повредил друг полицаец.
Милан и ПСЖ играат вечерва на „Џузепе Меаца“ од 21 часот во клучен натпревар за изгледот на табелата во групата Ф во Лигата на шампионите, а особено за италијанскиот тим кој по три кола има само 2 бода и нема постигнато гол. ПСЖ е лидер со 6 бода, додека Борусија и Њукасл имаат по 4.
