Српските медиуми пишуваат дека фудбалерите на Србија решиле да ги донираат парите кои Александар Вучиќ им ги вети, за деца на кои овие пари им се најпотребни. Станува збор за милион евра кои Вучиќ изјави дека фудбалерите ќе ги добијат ако изборат директен пласман на Мундијалот.
Србија успеа во неделата да избори пласман на Светското првенство во Катар следната година, по сензационалната победа против Португалија во Лисабон, а пред патувањето во оваа држава претседателот Вучиќ им вети награда од милион евра доколку успеат директно да се пласираат на Мундијалот.
Откако фудбалерите успеаја да се пласираат, Вучиќ веднаш го исполни ветувањето и веќе во понеделникот уплати пари на сметка на Фудбалскиот сојуз на Србија. Медиумите пишуваат дека фудбалерите се договориле тие пари да ги донираат за лекување болни дечиња, на кои парите им се неопходни.
Оваа информација ја објавија бројни медиуми во Србија. Само за потсетување, победата на Србија ја донесе Александар Митровиќ со гол во 90 минута за конечен резултат од 2 : 1.
Уште нема официјална потврда од Фудбалскиот сојуз на Србија или од Владата на Србија, но би требало истата да пристигне во текот на денот.