Репрезентацијата на Гана со многу посилен состав ќе го дочека овогодинешното Светско првенство во Катар откако ФИФА даде зелено светло шестмина играчи од Европа да заиграат за оваа африканска земја.
Членовите на Фудбалската асоцијација на Гана веќе извесно време бараат низ светот играчи чии корени се од оваа африканската земја за да ги убедат да не ги бранат боите на државите каде што се родени и да се свртат кон земјата од која потекнуваат. Според досега сработеното, мисијата е многу успешна.
Претседателот на ГФА, Курт Окраку, објави дека нивната репрезентација значително ќе се засили за Мундијалот во Катар.
Дел од играчите кои добија право на настап се Мохамед Салису (централен дефанзивец, Саутемптон), Стефан Амбросиус (централен дефанзивец, Хамбургер), Патрик Пфајфер (централен дефанзивец, Дармштад), Рансфорд-Јебоа Кенигсдерфер (напад, Хамбургер), а секако најзвучното засилување е напаѓачот на Атлетик од Билбао, Ињаки Вилијамс.
Освен Салису, кој е роден во Гана па преселен во Англија, сите останати се родени во Европа, некои и од мешани бракови како Пфајфер и Кенигсдерфер, кое заедно со Амбросиус се родени во Германија. Вилијамс, пак, е роден во Шпанија и има еден настап за Шпанија во 2016, за која играше и за младинската репрезентација. Има и 2 настапа за непризнаената репрезентација на Баскија. Инаку, Вилијамс стана првиот странец кој играл за Атлетик, а доби дозвола затоа што е роден во Баскија.
Гана доби и уште едно засилување од Премиер лигата. Десниот бек на Брајтон енд Хоув Албион, 21-годишниот Тарик Лампти се откажа од можноста да игра за англиската репрезентација и веќе треба да игра за Гана во Катар, земјата од која потекнуваат неговите родители. Лампти е талентиран играч кој играше за англиската репрезентација од 18 до 21 година, а во последните месеци интерес за него покажаа Арсенал и Тотенхем.
Сите шестмина допрва треба да го имаат своето деби во дресот на популарните „Црни ѕвезди“.
Гана на Мундијалот во Катар е во групата Х со Португалија, Уругвај и Јужна Кореја, а за тоа се избори откако во африканскиот бара7 ја изненади Нигерија елиминирајќи ја.
