Германската министерка за надворешни работи Аналена Баербок даде недвосмислена поддршка за Украина при нејзината денешна посета на Киев.
На заедничката прес-конференција, Баербок и украинскиот министер за надворешни работи Дмитро Кулеба рекоа дека никој нема да може да забие клин меѓу двете земји, а Баербок истакна дека Германија е подготвена да плати висока цена во економска смисла за да ги ограничи напорите на Русија.
Украинските власти јавно ја критикуваа Германија дека одбила да му продаде оружје на Киев и дека не е премногу ентузијастичка за запирање на протокот на гас преку гасоводот Северен поток 2 во случај Русија да започне инвазија на Украина, пишува Reuters.
Иако Русија распореди 100.000 војници во близина на својата граница, таа вели дека нема планови за напад. Москва бара безбедносни гаранции од Западот, вклучително и ветување дека Украина никогаш нема да влезе во НАТО.
„Стоиме покрај Украина. Никој нема да може да забие клин меѓу нас. Почитуван Дмитро, знаеш дека можеш да сметаш на Германија“, рече Баербок.
Што се однесува до прашањето за оружјето, Кулеба рече дека „треба да се бара заеднички јазик“.
„Тоа беше искрен разговор, овде имаме различни ставови. Но, наша задача е да бараме заеднички јазик и решенија. И мислам дека денеска најдовме заеднички јазик и нацрт-решение. Сега чекаме натамошни чекори од германската влада“, рече Кулеба.
Да потсетиме, Баербок во четвртокот цврсто застана зад одбивањето на Германија да испрати оружје во Украина за да се одбрани од можна руска агресија. Неподготвеноста на Германија да се приклучи на другите членки на НАТО, како што се Соединетите Американски Држави, Велика Британија и балтичките земји, предизвика чудење кај сојузниците и фрустрација кај прозападната влада на Украина во Киев.
Новата германска влада на социјалдемократот Олаф Шолц најави дека работи на смирување на кризата, но го отфрли испраќањето оружје, што е став на поранешната влада на поранешната канцеларка Ангела Меркел.
„Кој разговара, не пука. Затоа, едноставно е погубно да се одбие продолжувањето на дијалогот“, рече Баербок во четвртокот, мислејќи на новата размена на аргументи меѓу Москва и Вашингтон и разговорите меѓу украинските и руските политички советници.
Германија има најсилни економски врски со Москва од која било друга голема западна сила и купува половина од својот гас од Русија.
