Денис Јепел доживеа необична и речиси фатална повреда откако на натпрервар од четвртата германска лига со главата удри во бетонски ѕид.
Немилиот настан се случи во 23. минута на дуелот помеѓу Локомотиве од Лајпциг, тимот за кој Јепел настапува, и гостинскиот Кемницер. При обид да ја стигне топоката Јепел се лизна на дел надвор од теренот кој беше мокар, дојде до оградата од бетонски ѕид и со главата се удри во него.
Падна како покосен и за момент делуваше дека воопшто не е добар, но по помошта која му ја укажаа си дојде при себе и среќа мина без сериозни повреди.
Видеото стана хит на интернет, а Јепел веднаш беше пренесен во локалната болница каде останал цела ноќ за прегледи на главата и лекарско набљудување.
„Навистина имав среќа. Не ми најдоа никакви повреди. Дури ни главата веќе не ме боли“, изјави Јепел за германските медиуми. Тој веќе утре треба да се врати на тренинзите на Локомотиве, клуб кој е најпознат од Лајпциг, но заглавен во четвртата лига. Се работи за трикратен германски шампион кој го освоил и првото историско првенство во 1903 година, но денес е во сенка на вештачкиот РБ Лајпциг.