Германскиот претседател Франк-Валтер Штајнмајер им се извини во Танзанија на потомците на стотиците илјади жртви на колонијалното насилство, стотина години по крајот на германската колонијална власт во Источна Африка.
„Како германски федерален претседател сакам да побарам прошка за она што Германците им го направија на вашите предци“, изјави денеска Штајнмајер за време на посетата на градот Сонгеа во Танзанија. Тој им кажа на потомците дека Германија е подготвена заедно да се справи со минатото, а неговите зборови беа дочекани со ракоплескање.
На вториот ден од посетата на Танзанија, Штајнмајер се сретна со семејството чиј предок, началникот Сонгеа Мбано, и 66 други водачи беа погубени од германските колонијални власти во 1906 година. Првично Сонгеа бил поштеден од смртна казна бидејќи се предал. Сепак, тој самиот побарал да биде обесен заедно со другите водачи од народот Нгони. Германците се согласиле. Сонгеа Мбано денес е признат национален херој.
Германија во Источна Африка брутално ги задушувала востанијата на резидентното население. Според проценките на Танзанија, до 300.000 луѓе загинале во војната што се водела од 1905 до 1907 година. Штајнмајер го посети музејот „Маџи Маџи“ во Сонгеа.
Колонијалното минато на Германија завршило во 1918 година со поразот на германската империја во Првата светска војна. Средбата на германскиот претседател со потомците на убиените се одржа без присуство на новинари.
„Ви се придружувам во оплакувањето на оние што беа погубени. Се поклонувам пред жртвите на германската колонијална власт“, рече германскиот претседател.