Фотографот Џони Милер сними серија фотографии со помош на дрон од птичја перспектива низ која прикажува делови од светот во кои нееднаквоста меѓу класите е најочигледна.
Овие фотографии покажуваат населби на богати и сиромашни како егзистираат едни до други.
Милер го почнал проектот „Нееднакви глетки“ во Јужна Африка каде сакал да ги документира условите за живот во лимените куќарки што ги видел во близина на аеродромот во Кејптаун кога прв пат слетал во оваа земја.
По Јужна Африка, го проширил проектот на најголемите градови низ светот – од Мумбај, Мексико Сити до Најроби.
Со помош на дрон добил подобра перспектива на разликите во условите во кои живеат луѓето во овие градови.
„Нееднаквоста честопати е скриена и тешко е да ја забележите ако ги гледате нештата од иста перспектива. Визуелните бариери, самите згради, нѐ спречуваат да го видиме неверојатниот контраст што постои во нашите градови“, вели Милер.
Тој се надева дека неговото дело ќе ги поттикне луѓето да разговараат за она што го гледаат.
„Ако овие фотографии кај вас предизвикаат непријатно чувство на страв, очај или вознемиреност што на некој начин учествувате во системот што предизвикува нееднаквост, тоа е добро. Тоа ми беше намерата.“
