Дојде оној период од годината кога луѓето поминуваат голем дел од своето време кашлајќи, кивајќи и бришејќи го носот. Зимата со себе носи настинки, вируси и грип.
„Скенирањето“ на полиците во аптеките и читањето по форумите на интернет може да ве збунат и да ве одведат на погрешен пат кога лекувате настинка и грип.
Двајца фармацевти предупредија на некои од вообичаените грешки што луѓето ги прават кога сами се лекуваат од настинка и како всушност да си олеснат.
„Луѓето често земаат витамин Ц за да спречат настинки, но има малку докази кои го поткрепуваат тоа“, објасни Садик Ал-Хасан, фармацевт од градот Бат во Обединетото Кралство.
Некои студии сугерираат дека витаминот може да помогне побрзо да се исчистат настинките, но доказите сè уште се прилично неубедливи.
„Друг популарен производ за настинка и грип меѓу пациентите е ехинацеа“, објасни фармацевтот.
Ехинацеа е билка за која експертите некогаш мислеле дека го стимулира имунолошкиот систем поефикасно да се бори против инфекциите. Но, неодамнешните студии покажаа дека овој додаток во исхраната малку ја намалува можноста за настинка.
Мајк Хјуитсон, фармацевт од Сомерсет, ги предупреди луѓето да не користат остатоци од антибиотици што би можеле да ги најдат во нивните домови.
„Грипот или обичната настинка се вирусни инфекции и не можат да се лекуваат со антибиотици. Не постои директен третман за лекување на двете вирусни инфекции, сè е во управувањето со симптомите“, додаде тој.
Мајк предложи луѓето да се држат до едноставни лекови за ослободување од болка, како што е парацетамол, за да помогнат во контролата на треската, како и да пијат многу вода за да останат хидрирани.
„Генерално ги советувам луѓето да користат небрендирани производи кои често се исто толку ефикасни како брендираните производи, но со малку пониска цена“, рече тој.
И двајцата медицински експерти истакнаа дека во случај на настинка и грип, превенцијата е секогаш подобра од лекувањето.