Киксот на Франција на стартот на мундијалските квалификации одекна ширум светот како фудбалски шок откако светскиот шампион беше запрен од Украина.
Антоан Гризман синоќа го одигра целиот натпревар, а со неговиот гол во 19-тата минута Французите поведоа, но автоголот на Кимпембе и одличната украинска одбрана спречија француско славје.
По натпреварот токму Гризман ја доведе во прашање тактиката на селекторот Дидје Дешан, кој според него не извадил доволно офанзивни латерални фудбалери.
„Веројатно имавме потреба од повеќе офанзивни играчи кои се способни да одат еден на еден покрај аут-линиите. Ќе научиме да играме со таков систем и ќе се обидеме повторно да почнеме да победуваме“, изјави тој за TF1.
Но, Дешан на терен истрча со Жиру како партнер на Гризман во нападот, а по крилните позиции беа брзоногите Мбапе и Коман, додека зад нив оперираа Ернандес и Павар.
„Навистина сакавме да победиме, но не одигравме добар натпревар. Детално ќе го анализираме и ќе се обидеме да се подобриме“, додаде тој.
Претходно и селекторот изјави разочараност од неостварената планирана победа.
