Веројатно не постои играч на светскиот фудбалски пазар кој во моментов привлекува толку внимание како неверојатниот Грузиец од редовите на Наполи.
Минатото лето Хвича Кварацхелиа од Динамо од Тбилиси пристигна во Наполи во обид да се покаже пред фудбалска Европа. Наполи сезонава убедливо води во Серија А и многу веројатно дека конечно по ерата на Марадона ќе освои Скудето. Со 12 голови и неверојатни 15 асистенции, заедно со голгетерски расположениот Виктор Осимхен, младиот Грузиец и соиграч на нашиот Елиф Елмас е најзаслужен што Наполи игра така добро.
Веќе никој не зборува за канонадата голови на Ерлинг Холанд во Премиер лигата, ниту за брзоногиот Килјан Мбапе во ПСЖ, туку сега сите зборуваат за тоа дека цената на Кварацхелиа скокна на 60 милиони евра на реномираниот Transfermarkt, и јасно дека на Наполи ќе му биде страшно тешко да го задржи.
Негов менаџер е неговиот сонародник Мамука Џугели, кој за Кварадона, како што го нарекоа италијанските медиуми и навивачи, вели дека пред да дојде во Наполи сакал да заигра за Реал Мадрид, иако неговиот татко е навивач на Барселона.
„Неговиот татко и јас сме навивачи на Барселона, а Квара го сака Реал Мадрид“, вели Џугели.
„Би бил многу среќен да го видам во дресот на Барселона. Но, тој е мадридиста. Претседателот на Наполи ме замоли да не се брзам да договарам трансфер бидејќи Квара е среќен во Неапол“, додаде менаџерот.
Сепак, кога менаџер јавно ќе потенцира за кој клуб навива неговиот клиент, кој згора на сѐ е на врвот на трансфер пазарот, тогаш јасно е каква порака упатува кон челниците на шпанскиот гигант.
Сега на потег е Реал Мадрид, кој за уште на лето да го донесе Кварацхелиа сигурно ќе треба дебело да искешира, оти ништо чудно до крајот на сезоната неговата цена да стане 100 милиони евра.
